يقول المثل العربي: المنحوس منحوس ولو علقوا على راسه فانوس.. وقد شارك بعض نشطاء مواقع التواصل الاجتماعى بعضهم البعض بمواقفهم التي شعروا فيها ان النحس يلاحقهم. ومن اطرف مواقف النحس التي اعترفوا بها: محمد يقول: أول يوم أهرب من المدرسة اتقفشت.. هبة قالت: شربت صابون بدل العصير.. وقال طارق: تصوروا ان عيد ميلادي 29 فبراير/ شباط.. اما عاصم فقال : سافرت الكويت والشركة ولعت قبل ما اوصل.. اليكم مواقف مضحكة عديدة يرويها من وقعوا ضحية النحس بروح النكتة.. بتصرف عن فيتو.
كارت الـ 25
قال أحمد ساخرا:" مرة كنت ماشي بتكلم في الفون، لقيت كارت بـ 25 جنيه اتصالات من كتر الفرحة الفون وقع وغيرت شاشته بـ 1300 جنيه، من ساعتها لما بلاقي حاجة بطمن على الفون أنه في جيبي الأول".
أول يوم أهرب اتقفشت
أضاف محمد:" أيام المدرسة كنت ملتزم أوي خاصة بالحضور والانصراف وكان زميلي كل يوم يزوغوا وفي يوم قررت إني أعمل زيهم، وخرجت من الفصل وروحت لمكان السور اللي بيهربوا منه، وحاولت اطلع من عليه بسرعة وكان عالي وفيه صعوبة شديدة لدرجة أن هدومي اتقطعت، وبعد ماطلعت في الشارع وقفت انفض هدومي لقيت الفصل كله طالع من البوابة علشان المدرس ماجاش". وروي إبراهيم:" قعدت 20 سنة مانزلتش مصر، والأربع سنين اللي نزلتهم حصل فيهم ثورتان واتغير 4 رؤساء".
شربت صابون بدل العصير
قالت هبة:" كنت في الصيف والدنيا حر أوي، ولقيت ازازة مليانة عصير مانجة، وروحت شاربها مرة واحدة وعنيك ماتشوف إلا النور طلعت صابون سائل".
29 فبراير
أضاف طارق:" عيد ميلادي 29 فبراير".
قال عبد الرحمن:" جاتلي منحة ألمانيا، ولما روحت وزعوا الخبرات المتبادلة ورجعت مصر". وأضاف بيكو:" لسه من يومين بشحن كارت 100جنيه وموبايلى بشريحتين اتصالات وفودافون، وعامل المكالمات على فودافون وبشحن لاتصالات وكتبت الرقم وبعت وقطعت الكارت ورميته، وبعدين لقيت رسالة بتقول الرقم غير صحيح، ونسيت إني عامل الاتصال على فودافون مش اتصالات، من ساعتها بقا وانا مش قادر اتكلم ولا اكل".
الموبايل
قالت مي:" كنت في ثانوي وواد مز كان بيبصلي جامد أوي، افتكرته معجب من كتر اهتمامه، جه يوم الدرس ومعاه مامته، وجه وقف جنبي وبص في عنيا، وقالي بعد إذنك واخد فوني وعطاه لمامته وقالها دا اللي عاوز زيه".
وروت ريهام:" كنت بحب واحد بس هو كان فقير، وكان لسه قدامه كتير عشان نتخطب وكدا، وفي نفس الوقت اتقدملي واحد غني، فوافقت واتجوزته وقولتله أهلي غصبوا عليا ومعرفش ايه، وبعد خمس سنين جوزي فلس وحبيبي سافر وفتح مكتب هندسة خاص ليه، وبقي غني جدا ماشاء لله، انا والنحس قصة عشق".
أم العروسة ماتت
أضاف جيفارا:" كنت بحب بنت وروحت اخطبها ومعايا أهلي سمعت من على السلم صويت، أمها ماتت وقمة النحس أنها بقت مراتي دلوقتي".
الشركة ولعت
وقال عاصم:" سافرت الكويت عشان اشتغل والشركة ولعت قبل ماوصل بساعة".
للتواصل معنا 